قصة غرامـــــــي

قصة غرامي

قصه غرامي مع رجفه البال عشقت بنت ٍ ما بها شي يشان ِ
هي من حلاها لها القلب ميال والقلب ما عمره عشق حد ثاني

بنت ٍ رزينه تسبي العين بالحال بوصوفها تشبه وصوف الدماني
حلو الكلام بشفّها عذب ٍ زلال لا من مشت يا ناس تمشي بهواني

بخدودها شمس ٍ وبعيونها ظلال وجه ٍ قمر في وسط ظلما يبان ِ
قلبي مقيّد في هواها بالاغلال لا شفتها بالحيل يبرد كياني

كانت براءه حبنا مثل الاطفال احبها وتحبني حب ٍ اناني
حب ٍعفيف ٍ صار يضرب به امثال بالصدق والطيبه وكل المعاني

بس الزمن جاب البلايا والاهوال فرق عيوني عن عيونه وشان ِ
تبكي على فرقاي والدمع همّال تسهر تناديني بشوق وحنان ِ

تبكي وحيده فاقده كل الآمال تنشد اخباري بكل قاصي وداني
واسهر انا بالشوق والشوق قتّال والراس شيّب والمرض لي غزاني

ابكي ليالي انتحب طول الآجال الحب مات وموّته ذا الزمان ِ
همي كبير ٍ كافر ٍ صار زلزال زلزل حياتي حب ضاع بثواني

ما لي رفيق ٍ غير دمعي وموال جرحي عميق وجسمي اليوم فاني
ياهي مصيبه ياهو هم ٍ وغربال ياهي بلاوي من زمن لي قساني

كلمه وداع ٍ يا ملا كيف تنقال من بعد عشره عشتها في امان ِ
لا دق جوالي ولا هل مرسال يحمل اخباره يرجع لي اتزاني

صاب الجنون الشاعر وصابه خبال مالوم نفسي لو تزايد جناني
ما عاد لي من بعدها حال او مال من بعدها ما اريد يا ناس ثاني